Югары Налим авыл китапханәсендә китапханә фестивале узды

Зәй районының Югары Налим авылы китапханәсе «Ачы сугыш эзләрен китап битләре саклый» дип исемләнгән китапханә фестивален уздырды. Әлеге чара Югары Налим, Сармашбаш, Сарсаз-Баграж, Урта Баграж, Югары Баграж авыллары китапханәләренең берләшкән көчләре белән оештырылды.

Фестивальдә катнашучылар сугыш темасына багышланган күргәзмәләр белән танышканнар, театральләштерелгән күренеш караганнар, әдәби әсәрләрдән өзекләр һәм шигырьләр тыңлаганнар. Китап бәйрәме патриотик җырлар белән бизәлгән.

Әлеге әһәмиятле чарада мәдәният хезмәткәрләре дә актив катнашты.

«Фестиваль барышында тамашачылар сугышның ачы хатирәләрен яңарттылар, батырлык һәм сабырлыкка сокландылар. Әлеге чара яшь буында патриотлык тәрбияләүдә зур роль уйнады. Китапханәләрнең берләшеп эшләве нәтиҗәсендә, фестиваль тагын да күркәмрәк һәм эчтәлеклерәк булды. Мәдәният хезмәткәрләренең актив катнашуы исә чарага аерым җанлылык өстәде.Сармашбаш авылыннан Рәзилә Камалиева, Налимнан Разия Рамазанова һәм Сарсаз-Баграждан Андрей Кузьмин сугыш темасына үзләре язган шигырьләрен сәнгатьле укыдылар. Фестиваль тәмамланганнан соң, катнашучылар киләчәктә дә шундый ук әһәмиятле һәм файдалы чараларны бергәләп оештырырга килештеләр», – дип хәбәр итте Сарсаз-Баграж авылы китапханәчесе Марина Халикова.