Игорь Дмитриев: «Елан елы минем өчен бик продуктив булды»

 – Минемчә, нинди елда тууына карамастан, бар кешенең дә характерында уңай яклары да, тискәре сыйфатлары да бар. Кемдәдер аның уңайлары күбрәк, ә кемдәдер тискәреләре өстенлек итәдер. Кешенең характеры да, тормыштагы адымнары да гаиләдән, тәрбиядән киләдер дип уйлыйм.

Үземә килгәндә, мин – киң күңелле, җаваплы. Начаррак гадәтләремә ялкаулыкны һәм ярсучанлыкны кертер идем. Әлбәттә, яшь барган саен, кызып китүләр азая, үз-үзеңне кулга ала белә башлыйсың.

Узып киткән Елан елы минем өчен бик продуктив булды. Белгәнегезчә, беренче сольный концертым уңышлы гына килеп чыкты. Иҗатымда да алга китешләр булды, күп җырлар яздырылды. Ел башында мәхәббәтемне очраттым.

Ат елында да үз юлымнан туры атлап, иҗатта да, гаиләдә дә, финанс буенча да үземне үстерергә телим. Әлбәттә, бу теләкләр киләчәктәге барлык еллларга да кагыла. Ашыгырга ярамый, эшеңнән тәм табып, һәр көнгә сөенеп, барлык мөмкинлекләрдән файдаланып яшәргә кирәк. Иң мөһиме, үземә дә, барлык кешегә дә сәламәтлек телим.

Фото: Игорь Дмитриев.