Апрель аенда бакча эшләре

• Кар эреп беткәннән соң, көздән утыртылган суган һәм сарымсак өсләренә ябылган япманы ачарга онытмагыз.
• Агачлардагы көздән калган җимешләрне дә коеп төшерергә кирәк булыр, чөнки алар җимеш череге яки монилиоз кебек авыру чыганаклары булып тора. 
• Апрельдә алмагач, груша, слива, чияне утырта аласыз. Җир яхшы җилләп өлгерсен өчен, чокырларны агачлар утыртуга ике атна кала казып куялар. Һәр чокырга ике-өч чиләк черемә яки таркалган торф-тирес компосты салыгыз. Минераль ашламалар кертергә кирәкми. 
• Роза чәчәкләрен, виноградны, җиләк өсләрен ачыгыз, югыйсә, алар чери башларга мөмкин. Розаларны ачканда, аларны игътибар белән карагыз һәм, тимгелле урыннар күрсәгез, андый ботакларны сәламәт урынга кадәр кисегез. 
• Суган орлыгын да утыртуга апрельдә әзерлиләр. Орлык сатып алганда, аның зурлыгына игътибар итәргә кирәк. Оптималь зурлык — якынча 2 см, әгәр ул эрерәк булса, яшел кыякка китәчәк. 
• Туфрак әле бик дымлы чакта, бакчага азотлы ашламалар (мочевина, аммиак селитрасы, тирес сыекчасы) кертелә. Бу вакытта алар туфракта әйбәт эри, язгы су инде аларны аскы катламнарга агызып алып төшеп китә алмый.
• Апрельнең беренче яртысында иртә өлгерүче кәбестәне күчереп утырту тәмамлана, ә икенче яртысында помидор, борыч һәм баклажаннарны күчереп утырталар.

Фото: «Туганайлар»