Татарстанда 2,8 меңнән артык сайлау участогы ачылды

17 сентябрьдә Татарстанда РФ Дәүләт Думасына һәм Татарстан Дәүләт Советына өстәмә сайлауда барлык сайлау участоклары ачылды. Сайлау Роспотребнадзор таләпләренә катгый туры китереп үткәреләчәк. Бу турыда "Татар-информ" хәбәр итә.

46 вакытлы участок Республикада бала тудыру йортларында, хастаханәләрдә, шифаханәләрдә һәм тикшерү изоляторларында ачылды . Шундый ук участоклар «Казан» халыкара аэропортында һәм Казан-1 тимер юл вокзалы бинасында да эшли.

Үз участогыңның номерын Россия Үзәк сайлау комиссиясенең электрон сервисларында, «Минем сайлау участогы» Telegram-ботында табарга мөмкин.

Татарстан Үзәк сайлау комиссиясе мәгълүматлары буенча, участокларның 98 процентында камералар бар. Алар 17-19 сентябрь көннәрендә эшләячәк. Иҗтимагый күзәтүнең республика үзәгендә тәүлек буе трансляция барачак. Аны җәмәгатьчелек, сәяси партияләр, ТР Үзәк сайлау комиссиясе вәкилләре, шулай ук кирәкле техник әзерлек узган битараф булмаган гражданнар карыячак.