Күпбалалы гаиләләр өчен яңалык

Шул ук вакытта күпбалалы гаилә статусы, гаиләдә зур балалар балигълык яшенә җиткәч тә алынмыйча, сроксызга әйләнәчәк. Министрлар Кабинеты Дәүләт Советына шундый закон проекты керткән, дип яза «inkzan». Закон проекты Россия Президенты Владимир Путинның гыйнвар ае указына (күпбалалы гаиләнең бердәм статусын билгеләгән указ) бәйле рәвештә эшләнгән. Хәзер Россиядә өч һәм аннан күбрәк балага ия булучы гаилә күпбалалы гаилә булып санала һәм бу статус сроксыз билгеләнә. Моңарчы Татарстанда 18 яшькә кадәрге өч һәм аннан күбрәк балага ия булган гаиләләр күпбалалы гаилә буларак исәпләнелеп, зур бала балигълык яшенә җиткәч, күпбалалы гаилә статусы алына иде. Хәзер Татарстан Гаилә кодексына күпбалалы гаиләнең яңа билгеләмәсе кертеләчәк. Шулай ук халыкка адреслы ярдәм турында Татарстан законына да үзгәрешләр кертеләчәк. Күпбалалы гаиләләргә социаль ярдәм чаралары гаиләдә зур балага 18 яше тулганчы (яки көндез укыган очракта — 23 яше тулганчы) күрсәтеләчәк. Ярдәм чараларын киңәйтүгә 389 миллион сум таләп ителәчәк. Законга аңлатма язуында әйтелгәнчә, Татарстан Рәисе Рөстәм Миңнеханов республика бюджетыннан өстәмә акча бирүне килештергән дә инде.

Ватаным Татарстан