Кадыйров: «Татарстан яшьләр белән эшләү өлкәсендә Россия төбәкләре арасында иң яхшысы дип танылды»

Бүген Дәүләт Советы утырышында яшьләр сәясәтен гамәлгә ашыру мәсьәләләре турында фикер алыштылар. 2025 елда Татарстанда яшьләрнең бүгенге хәле һәм яшьләр сәясәтен гамәлгә ашыруның барышы турындагы мәгълүмат белән Татарстан Республикасы Яшьләр эшләре министры Азат Кадыйров чыгыш ясады.

Министр билгеләп үткәнчә, Татарстанда миллионнан артык яшь граждан яши, бу республика халкының дүрттән бер өлешен тәшкил итә.

Азат Кадыйров сүзләренчә, 2025 ел нәтиҗәләре буенча Татарстан яшьләр белән эшләү өлкәсендә Россия төбәкләре арасында иң яхшысы дип танылган. «Мондый нәтиҗәгә республика эчендә ведомствоара бердәм эш нәтиҗәсендә генә түгел, ә безнең яшьләр сәясәтенең федераль экосистемасына тулысынча кушылуыбыз нәтиҗәсендә дә ирешелде», — дип ассызыклады Татарстан Республикасы Яшьләр эшләре министры.

«Татарстан Республикасында яшьләр сәясәтен үстерү» дәүләт программасын финанслау күләме 2025 елда 8,9 млрд сум тәшкил итте, 2026 елда — 9 млрд сум. Узган ел республикага «Яшьләр өчен төбәк» проекты һәм Россия Яшьләренең форум кампанияләре кысаларында 276 млн сумнан артык федераль акча җәлеп ителгән. Акчалар Химиклар мәдәният йорты базасындагы яшьләр үзәген ремонтлауга һәм тармак белгечләре өчен белем бирү программаларына тотылды.

2025 елдан «Яшьләр һәм балалар» яңа милли проекты гамәлгә ашырыла. 2025 елда төрле программалар кысаларында Татарстанда 7 объект төзелде: Балык Бистәсе һәм Саба районнарында-2 яшьләр үзәге, Кукмара, Сарман, Баулы, Биектау, Норлат районнарында 5 сәламәтләндерү лагере. Узган ел 2,77 млрд сумга 32 объектка капиталь ремонт ясалган: 5 яшьләр үзәге, 7 яшьләр клубы, 9 психологик-педагогик ярдәм үзәге,11 балаларны савыктыру лагере. 2026 елга реновация планнары турында сөйләгәндә, Азат Кадыйров билгеләп үткәнчә, 3 млрд сумга якын 30 объект планлаштырылган.

Яңаруга карамастан, министр яшьләр сәясәте учреждениеләренә йөрү проценты югары булмавына игътибар итте. «Без системалы рәвештә алымны үзгәртәбез: эш вакытын 21:00 сәгатькә кадәр озайтабыз, мәгълүмат көн тәртибен яңартабыз, мәктәпләргә, көллиятләргә югары уку йортларына чыгабыз — яшьләргә мөмкинлекләр турында хәбәр итәбез», — диде ул.

Яңа тенденцияләргә килгәндә, Азат Кадыйров билгеләп үткәнчә, тикшеренүләр статистикасы буенча балалар, яшүсмерләр һәм яшьләр атна саен интернет челтәрендә 4-9 сәгать үткәрә, ә атналык күрсәткеч 24 сәгатьтән артып китә. «Безнең бурыч — бу талантларны күңел ачудан иҗат итүгә, шаукымсыз кулланудан җаваплылыкка: „эшлекле патриотизмга“ юнәлтү», — дип билгеләп үтте Азат Кадыйров.

Проблемалы мәсьәләләр арасында министр наркотиклар куллануны атады, ул яшьтән үк башлана. «Россия Яшьләре тикшеренүләре беренче татып карауның яше 17 яшьтән 13,8 яшькә кадәр кимүен күрсәтә, шул ук вакытта наркотик контент белән танышу 8 яшьтән башлана, ә тулаем алганда иртәрәк тә — уеннар, мемнар, роликлар аша, — диде Азат Кадыйров. — Балаларның 70% тан артыгы наркотиклар турында яшьтәшләреннән түгел, ә интернет челтәреннән белә». Мондый очракларда, министр сүзләренчә, проблемаларны хәл итү өчен системалары республикада булган психологик-педагогик ярдәм үзәкләре һәм ышаныч телефоннары кушыла. Ярдәм цифрлы платформа һәм Татарстанның бөтен территориясен колачлаган тәүлек буе эшли торган ышаныч телефоннары аша күрсәтелә, аларны бердәм номерда берләштерү планлаштырыла.

Азат Кадыйров билгеләп үткәнчә, 2025 елда 224 меңнән артык бала ялга киткән, шуларның 6,8 меңе — Кырымда һәм Краснодар краенда. Махсус хәрби операциядә катнашучыларның 9 меңнән артык баласы бушлай ял иткән. Быел савыктыру кампаниясен финанслау 3 млрд сум тәшкил итә. 239 мең баланың ялы планлаштырылган, шул исәптән 8657 бала махсус хәрби операциядә катнашучылар гаиләләреннән, 2 450 сәламәтлеге ягыннан мөмкинлекләре чикләнгән һәм 10 903 авыр тормыш хәлендә калган балалар.

Яшьләр эшләре министры сүзләренчә, эшкә урнаштыру — деструктив тәртипне профилактикалауның иң нәтиҗәле чараларының берсе. Узган ел 16 меңгә якын бала студентлар хезмәт отрядлары составында эшләгән, 6 меңгә якын бала яңа эшче һөнәрләрен үзләштергән. 2026 елда кимендә 15 мең студентны эшкә урнаштыру планлаштырыла. 

Фикер алышу барышында парламентарийлар Россиянең башка төбәкләрендә яшәүче татар балалары өчен Татарстан балалар лагерьларындагы сменалар, яшь журналистлар өчен «Алтын каләм» конкурсы үткәрү, наркотикларны иртә куллануның сәбәпләре белән кызыксындылар, дип хәбәр итә Татарстан Республикасы Дәүләт Советы матбугат хезмәте.

Азат Кадыйров билгеләп үткәнчә, Россиянең башка төбәкләрендә яшәүче татар балалары өчен «Милләтебез хәзинәләре» сменасы оештырыла, яшь журналистлар өчен «Алтын каләм» конкурсын үткәрү өчен финанс чаралары каралган, ә наркотикларны яшьтән куллануның сәбәпләрен министр компьютер уеннары дип атады.