Төрледән-төрле ни төрле

Хуҗабикәләргә файдалы киңәшләр

Туганайлар, 22 сентябрь 2023 - 08:30

486

Бу киңәшләр гел кул астында булсын өчен саклап куегыз.

Он сатып алганчы, иң элек җитештерү датасына игътибар итегез: яңа гына тарттырылган он камыр ризыгы өчен бармый. Начар күперә, тәме дә искитәрлек булмый. Тегермәннән чыкканнан соң онга якынча бер ай чамасы «өлгерергә» кирәк.
Сарымсак чистарту катлаулы, озак эш. Ләкин моны да җайлы гына «хәл итеп» була. Сарымсакны микродулкынлы мичкә 15 секунд иң югары кызулыкта тотыгыз. Сарымсак үзеннән үзе чистартылачак.
Йомырка җайлы гына әрчелсен дисәгез, пешерер алдыннан суга лимон согы һәм азрак сода салыгыз.
Суган тураганда еламыйм дисәгез, турар алдыннан 15 минутка суыткычка тыгып торыгыз.
Сөтне кайнатыр алдыннан савыт читенә сыер мае сөртсәгез, сөт кайнап ташымаячак.
Пищевая пленканы суыткычта саклагыз. Шулай итсәгез, ул ертылып аптыратмаячак, кулга ябышмаячак, гомумән, аның белән нәрсәнедер төрү, чорнау күпкә җиңелрәк булачак.
Яшелчәләрне пешергәндә, витаминнары саклансын өчен, агач кашык белән генә болгатыгыз.
Пычакны кайнар суда юарга ярамый, юкса, үтмәсләнә.
Үтүктәге кызган эзләрне нашатыр спирты һәм уксус катнашмасы бетерә. Йомшак чүпрәкне шул катнашмада чылатып, үтүкне сөртегез.
Салатка үсемлек маен тоз, уксус һәм борычтан соң гына салыгыз. Исегездә тотыгыз: тоз майда эреми.
Кайбер балыкларны пешергәндә тәмсез ис чыга. Андый очракта балык янына петрушка, сельдерей салыгыз. Шулай ук башлы суган да булыша.
Вазага берничә тамчы савыт-саба юа торган сыекча тамызсагыз, кыр чәчәкләре озаграк торыр.