Аяк астында файдалы үлән – тузганак

Сары чәчәкле бу үләнне болында да, кырда да, бакчада да күрәсең. Дәвасы тамырында, яфракларында һәм чәчәгендә.

- Даруны киптерелгән һәм вакланган тамырдан ясыйлар. Ул бер стакан кайнаган суда 20 минут төнәтелә. Сөзеп һәм суытып, аппетитны күтәрү, эчне йомшарту һәм үт кудыру өчен эчәләр;

- Кипкән тамырдан алынган порошок организмнан тир һәм бәвел белән зарарлы матдәләрне чыгару өчен кулланыла;

- Пешкән тамыр һәм кипкән үлән саркындысы эч авыртканны баса, үт һәм бәвел юлындагы ташларны чыгаруга да ярдәм итә, экзема, фурункулез һәм пешкән җирләрне дәвалаганда файдаланалар;

- Ашкайнату системасы бозылганда тузганак балы файдалы

Аның өчен 200 г чәчәкнең чәчәк төбен өзеп ташларга. Салкын су белән юарга һәм 1,5 литр кайнар су коярга. Томалап, тәүлек буе төнәтергә. Аннан сөзеп, төнәтмәгә 2 лимон согы һәм 1,5 кг шикәр комы өстәргә һәм болгата-болгата куерганчы кайнатырга. Сиропны җылы килеш банкаларга тутырырга.