Питрәчтән Николай Морозов: «Ел буе «Туганайлар» белән бергә булырбыз»

Безне үзебезнең керәшен газетасына яздыртудагы ярдәмнәре өчен, район администрациясенә, җитәкчеләргә рәхмәтебезне үзебезнең яраткан «Туганайлар»ыбыз аша җиткерәм.

Мин үзем ун елдан артык «Туганайлар» газетасын яздыртып алам. Дөрес, интернетта да карау мөмкинлеге бар. Ләкин үзебезнең газетаны күрү, аны кулга алып уку, төрле төбәкләрдәге карендәшләр өчен горулык хисе кичерү — бөтенләй икенче нәрсә.

Җай чыгудан файдаланып, газета аша, «Туганайлар»ның баш редакторына һәм хезмәткәрләренә үзебезнең авыл җирлеге халкы исеменнән зур рәхмәт белдерәм. Безнең керәшен дөньясының газетада матур чагылыш табуы, тормышыбызда ирешелгән нәтиҗәләрне яктыртып баруыгыз, җирлегебез кешеләрен, аларның уңышларын күрсәтүегез өчен дә бик зур рәхмәт. 

Гомумән, керәшен дөньясы, үзебезнең тормыш, йола-гадәтләребез белән кызыксынган кеше «Туганайлар»га һич тә битараф кала алмыйдыр. Бу елыбызга да «Туганайлар» белән кердек һәм ел дәвамында да бергә булырбыз, дигән фикердә калам.