Максимовлардан рецептлар

Чуртан балыгын, бигрәк тә зурларын, кыздыргач, коры була, дип, күпләр өнәми. Әмма юкка. Күп итеп суган турап, каймакта томалап пешерсәң, чуртан балыгы ашап туймаслык тәмле була.

Әлеге салатны ясау өчен, ике кисәк ысланган скумбрия, 2­3 бәрәңге, 2 тозлы кыяр, 4 аш кашыгы яшел борчак, 1 кишер, майонез, яшел салат яфрагы, укроп, петрушка кирәк. Бәрәңге белән кишерне пешереп, шакмаклап турарга. Шуңа ваклап туралган тозлы кыяр, яшел борчак, туралган салат яфрагы, укроп, петрушка кушып, майонез салып әйбәтләп болгатырга. Табынга биргәндә, өстен балык кисәкләре, түгәрәкләп киселгән кишер белән бизәргә.

20 сантиметрдан да зур булмаган елга һәм күл балыкларын чистартып, башлары белән койрыкларын кискәч, турап, өч сәгать чамасы томалап пешерергә кирәк. Аннары, стерилләнгән ярты литрлы банкаларга тутырырга, калай капкачлар белән ябарга. 2 килограмм туралган әзер балык өчен 1,52 стакан үсемлек мае, 2 стакан су, 2 аш кашыгы уксус, 2 аш кашыгы томат пастасы, 8­10 түгәрәк борыч, 2­3 лавр яфрагы, бер аш кашыгы өеп тоз алына. Болардан 3­4 банка әзер консерва чыга.

Тәмле ашлар булсын!