Баграж җирлеге халкы Яңа елны каршы алырга әзерләнә

Зәй районының Сарсаз Баграж авыл җирлеге башлыгы Павел Минеев әйтүенчә, халык Яңа ел бәйрәменә йортларны тышкы  яктан да бизәгән

 – Безнең төп максаты – Баграж җирлегендә эш һәм ял өчен уңайлы шартлар тудыру, – дип сөйләде Павел  Николаевич 2021 елдагы эшләргә тукталып. – Үз авылыбыз тормышындагы барлык әһәмиятле вакыйгалар турында район газетасына да хәбәр итеп барабыз. Төбәгебезне яратабыз, аның бүгенгесе һәм үткәне белән горурланабыз. “Иделкәем & Кариев варислары” балалар һәм яшүсмерләр театр коллективлары төбәкара фестивалендә Сарсаз-Баграж мәдәният хезмәткәрләре “Теремкәй” дип исемләнгән спектакль белән II дәрәҗә дипломга һәм 20 мең сумлык сертификатка ия булды. 2021 елга куелган максатларыбызга ирештек. Кызганычка, коронавирус белән  чирләүчеләр генә әз булмады, терелә алмыйча бакый дөньяга китүчеләр дә булды. Алай да тормыш дәвам итә, Яңа ел алдыннан авылыбыз тагын да матурайды. Кайсыбер гаиләләр  өй эчен генә түгел, йортның урам ягын да матур итеп бизәп куйдылар.