Баш редактор сүзе

Менә Аждаһа елларын да озатып җибәрдек. Исеме бик куркыныч булса да, җисеме бер дә кот очарлык булмады. Бу елны газетабыз үзенең 10 еллык юбилеен билгеләп үтте. Кемдер 10 ел зур гомер түгел, дияр. Болгавыр заманнарда нигез салынып, үз кыйбласын, үз укучысын тапкан специфик газета өчен күп гомер ул 10 ел. Шушы вакыт эчендә безнең белән булган укучыларыбызга, актив хәбәрчеләребезгә, спонсорларыбызга, Яңа елга изге теләкләр теләп, Елан елында да бергә калыйк, дибез.
Инде килеп, Су Еланы елына керәбез. Елның яңа хуҗасын акыллылык, сакчыллык, яшәеш һәм яңарыш символы, диләр. Миңа калса, барысы да бүгенге көндә барыбызга да иң кирәк нәрсәләр!
Бу ел республикабызда экологик культура һәм тирә-якны саклау елы, дип игълан ителде. Миңа калса, экологик культурасы булган кешенең генә күңеле дә экологик яктан чиста була, һәм, киресенчә, күңеле саф кеше үз янәшәсендә дә тик матурлык кына тудыра, булганын әрәм итми саклый белә. Әйдәгез әле, туганайлар, урман-кырларыбызга, елга-чишмәләребезгә, авылларыбызга, ихаталырыбызга күз салыйк. Бар нәрсәбез тәртиптәме, авылларыбыз төзекме, чишмәләребез тибәме?
Бу елның җәендә бөтен җир шарыннан Универсиадага җыелачак кунакларны битебезне кызартмый каршыларга без әзерме?
"Безнең ил - уйнар-көләр җир,
Безнең ил - сандугач сайрар җир", - дип әйтерлегебез бармы?
Чисталык, пөхтәлек, матурлык елы белән сезне, карендәшләребез! Быелгы елларны да бергә уздырырга язсын!
Иң изге теләкләр белән,