Үри Чаллысы авылы музее кунаклар кабул иткән

«Үткәнен белмәгән халыкның киләчәге юк», диләр. Тарихыбызны тулырак күзаллау, халкыбызның данлы үткәнен кадерләп, киләчәк буыннар өчен мөмкин кадәр тулырак саклау юнәлешендә милли мәдәниятләр елы кысаларында, өлкәннәр көне якынлашу уңаеннан музейга районда урнашкан «Дельфин» сәламәтләндерү комплексы каршында эшләп килүче «Будь здоров» клубына йөрүчеләр (җитәкчеләре Нина Мусина) экскурсиягә килгәннәр. Алар музейдагы экспонатлар, Үри Чаллысы тарихы, авыл халкының бүгенге яшәеше турында кызыксынып караганнар, тыңлаганнар. Очрашу табын артында дәвам иткән.

«Мәшләктән Анастасия Федорова да килгән иде. Кунакларга әбисеннән калган керәшен күлмәген күрсәтте. Фотоларга төшерделәр, бик сокланып карадылар. Керәшен киемнәре, йолалары хакында сөйләде. Керәшен халык җырларын җырлап, биюләрен биеп, ял иттек», — диде Балык Бистәсе районының Бирдебәк авыл клубы җитәкчесе Евдокия Толстова.