“Туым Жондозы” конкурс-фестиваленең икенче сайлап алу туры Казанда узачак

Конкурста катнашу өчен гаризалар кабул итү тәмамланды. Ноябрь аенда 5 зона буенча сайлап алу турлары узачак. Чистай, Казан, Әлмәт, Кайбыч һәм Кукмара районы зоналарында конкурсның жюри членнары катнашучыларга бәя бирәчәк.

Беренче зона ярышы 17 ноябрь көнне Чистай шәһәрендә узды. Монда Чистай һәм Түбән Кама районнары көч сынашты.

Конкурс-фестиваленең икенче сайлап алу туры 20 ноябрь көнне Казанда узачак. Казан, Арча, Питрәч,Балык Бистәсе, Теләче районнары катнашачак. 

Җырчы Җәкәү йорты (Казан шәһәре, М. Худяков урамы, 11).

Башлана иртәнге 10.00.

«Туым Жондозы» конкурс-фестивале керәшеннәрнең үзенчәлекле мәдәниятен саклау һәм үстерү, халык җыруларын башкаручы талантлы үзешчәннәрне барлау, иҗат коллективларының профессионал дәрәҗәсен арттыру, толлерантлыкны ныгыту максатыннан үткәрелә.

Татарстан мәдәният министрлыгы, Я.Е. Емельянов исемендәге мәдәни үзәк, керәшеннәрнең «Бәрмәнчек» дәүләт фольклор ансамбле, республика керәшен иҗтимагый оешмасы тарафыннан оештырыла торган бу конкурста 5 яшьтән 35 яшькә кадәрге талантлы яшьләр катнаша.

Конкурс түбәндәге номинацияләр буенча үткәрелә:

«Аутентик вокал» (соло);

«Халык вокалы» (соло);

«Фольклор-эстрада вокалы» (соло);

«Фольклор-этнографик коллектив»;

«Халык җырларын башкаручы вокаль ансамбль»;

«Халык җырының заманча интерпретациясе»,

«Этник халык инструментлары ансамбле».