«Туганайлар» группасы кавыштыра: Ольга белән Артем тормыш корганнар

29 яшьлек Артем белән 22 яшьлек Ольга ВКонтакте социаль челтәрендә танышканнар. Артем үзенең сөйгән ярын «Туганайлар» газетасының группасы аша тапкан. Ярты ел очрашып йөргәннән соң, кияү егет Ольгага тәкъдим ясаган һәм 8 сентябрь көнне яшьләр гөрләтеп туй уздырганнар. 

Яшьләрнең туйлары элгәредән сакланып калган гореф-гадәтләрне искә алып, бик матур һәм жанлы, кызыклы узган. Кодаларны керәшенчә җырлап сәламләгәннәр, киленне дә бөтен кагыйдәләр буенча төшергәннәр, бал-май каптырып, ак мендәргә дә бастырганнар Ольганы. Туйны исә, «Бәрмәнчек» ансамбле солисты - Ильнур Ахатов алып барган. 

Шишкановлар гаиләсе Питрәчтә яшиләр. Артем «Казанские электросети»да, ә Ольга Алабугадагы психоневрология интернатында тәрбияче булып эшли. 

Яшь парларны чын күңелебездән котлыйбыз!