Түбән Кама районында 2002 елда яздырылып алынган керәшен җырулары

Арыдым да быел, талдым быел,

Сабаннарга җиккән ат кебек.

Сагындым да быел, саргайдым да быел,

Читлекләргә япкан кош кебек.

Ай, уйлата, ай, уйлата,

Мин җөрием урам буйлата.

Җөрмәс идем урам буйлата,

Җөрүләрем җанны җуата.

Җөгереп барам, җөгереп кайтам,

Бакча эченнән генә.

Кешеләргә белгертмичә,

Сызам эчемнән генә.

Сандугачның балалары

Сары була микәнни?

Чыршылар бер дә саргаймый,

Сабыр була микәнни?

Урамнарны узаек,

Тар басмалар сузаек.

Тар басмалар җитмәс булса,

Бер җыр җырлап узаек.