Шулай бервакыт Яңа елда булган маҗара: Югалган йөзек

Яңа ел һәркемгә дә саулык, илебезгә иминлек, муллык алып килсен. Укучыларыбыз, сынап карыйк, елан елы кемгә нинди уңыш китерер, бәхет капчыгын чишәрме?

— Могҗиза дигәннәргә мин балачакта ук ышанмый идем. Шулай да ышандырды бит тормыш. Югалган йөзегемне шактый озак эзләргә туры килде. Бер җирдән дә тапмагач, өметем өзелде. Яңа елга каршы төндә төшемә мине тәрбияләп үстергән әнием (әбием) керде. Ак күлмәктән, ак яулык япкан әнием миңа төбәлеп, югалган йөзегем турында сөйли:

— Кызым, син матур гөлләр үстерәсең, алар арасында ятмыймы йөзегең? — ди. Шуннан соң үзе каядыр юкка чыкты.

Иртән торгач та бу төш турында озак уйланып йөрдем. Яңа ел иртәсендә гөлләремә су сибәм дип тәрәзә каршына килсәм, йөзегем бегония гөле төбендә ялтырап ята. Бу табышка сөенүләр! Моны Яңа ел могҗизасы димичә ни диярсең?!