Мартта – Балык Бистәсе керәшеннәре айлыгы

Җәкәү җортындагы музейда март дәвамында “Балык Бистәсе керәшеннәренең мәдәниятен һәм көнкүрешен чагылдырган күргәзмә эшли. Аны барыгыз да барып карый аласыз.

Шулай ук, Я.Емельянов исемендәге мәдәни үзәкнең һәм “Туганайлар” газетасының  интернет киңлекләрендәге рәсми аккаунтларында бу районда туып-үскән күренекле керәшен шәхесләре, авылларның тарихлары белән дә танышырга була. 17 мартта – Юрий Гордеев, 28 мартта Татьяна Ефремова белән оештырылачак “туры эфир” да игътибарыгыздан читтә калмас.

18 мартта – угыз ризыгы әзерләү, ә 28 мартта сарык тиресе эшкәртү буенча  мастер-класс карарсыз.

Балаларның “Айбагыр” (17 март) һәм “Алан”фольклор коллективлары чыгышы, ул ансамбльләрнең тарихына багышланган видеолар да кызыксындырмый калмас

Бу мәдәни үзәктә 10 мартта – Балык Бистәсе егете, Г.Камал исемендәге татар дәүләт академия театры артисты Олег Фазылҗанов концерты, ә 25 мартта Алан-Полян авылы мәдәният йорты белән берлектә оештырылган әдәби кичә була.  

Балык Бистәсе керәшеннәре айлыгы 31 мартта Җәкәү җортында “Җакын дуслар җыелышкач” дигән бәйрәм концерты белән тәмамлана.