Мәләкәс авылыннан Александра Ванифатова: «Яшьләрдән калышмаска тырышам»

Тукай районы Мәләкәс авылында яшәүче Александра Вәнифатовага 62 яшь.

- Мин Мәләкәстә туып үстем. Берникадәр вакыт ирем Александр Николаевич белән шәһәрдә яшәгәч, әни авырып китү сәбәпле туган ягыбызга кайттык. Ирем, пенсиягә чыкса да, 43 ел инде сайлаган һөнәренә тугры калып,  юл төзекләндерү хезмәтендә эшләп йөри. Аны эштә хөрмәт итәләр.  Мин хуҗалык белән шөгыльләнәм, терлек, терлек карыйм. Сарыклар, кәҗәләр, тавыклар, бройлер чебиләре, күркәләр, үрдәк-мулардлар, казлар тотабыз. Ирем һәрвакыт командировкада булганлыктан, бакча эшләре дә минем өстемдә. Әлбәттә, балаларыбыз Лариса белән Ленар, аларның балалары ярдәм итә. Һәркемгә таныш булган яшелчәләрдән тыш, карбыз, кавын да үстерәбез.

Сәламәтлегемнән зарланмыйм. Әлбәттә, яшь үзе турында хәбәр иткәли, еш кына кан басымы күтәрелә. Медицина хезмәткәрләре Лилия, Гөлфина һәм Светланага карата җылы сүзләр әйтәсем килә – алар үз эшләренең профессионаллары: сизгер, ярдәмчел, игелекле кешеләр. Озак килмәсәм, үзләре шалтыраталар, анализлар тапшырырга, табибка барырга кирәклеген искәртәләр.

Мин үзем сәнгатьне яратам, бәйрәмнәрдә актив катнашам, яшьләрдән калышмаска тырышам. “Питрау " керәшен фольклор ансамбле кызлары мине барлык репетицияләргә чакыра. Ә халык иҗаты конкурслары, һөнәрчелек күргәзмәләре үткәрелгәндә, һичшиксез, аларда колмак ачыткысында әзерләнгән тәмле ризык тәкъдим итәм. Менә шулай бүгенге көнгә шатланып яшибез. Минем бер генә теләгем баш өстендә тыныч күк йөзе булсын иде.