Мәгариф ветераны Флюра Афанасьева медальгә лаек булды

Укытучы һәм остаз елын ябу уңаеннан, 29 январьда Казанда уздырылган тантанада Флюра Васильевнага «ТАССРның төзелүенә — 100 ел» медале бирелде. Бу олы бүләкне аңа республика Рәисе Рөстәм Миңнеханов үз куллары белән тапшырды. 

\

Гомеренең 46 елын укучыларга белем һәм тәрбия бирүгә багышлаган карендәшебез Флюра Афанасьева (Иванова) — Чистай районының Югары Кондрата авылы кызы. Ире, Чуваш Ялтаны авылыннан Павел Алексеевич 35 ел мәктәп директоры булып эшләгән (ул исән түгел инде). 

Үз районнарының Олы Талкыш, Түбән Каманың Елантау авылы мәктәбендә һәм Биектаудагы Дачное поселогы мәктәбендә укытканда да Флюра Васильевна укучыларына үз фәне булган математикадан ныклы белем бирә. Меңнәрчә укучылары аны оста укытучы, ышанычлы киңәшче буларак хөрмәт итәләр. 

Афанасьевлар дүрт балаларын да үзләренә лаеклы алмаш итеп тәрбияләп үстерәләр. Олы уллары Сергей Афанасьев — юрист. Михаил Афанасьев — Яшел Үзән районы башлыгы, Яшел Үзән шәһәре мэры. Төпчек уллары Алексей Павлович — Биектау районы администрациясе аппараты җитәкчесе. Кызлары Марина икътисад, идарә һәм хокук институтының психология кафедрасы педагогы.