Кушкүл авылының уңган гаиләсе Муллиннар

Күптән түгел генә шушы якларда булырга туры килде. Кечкенә генә бу авылның мәктәбе дә юк, балалар күрше Хуҗа Хәсән авылына укырга йөриләр. Аларны һәр көнне автобус килеп ала, кайтарып куя. Халкының да күбесе шушы авылга йөреп эшли. Шулай да, авыл халкы бик тырыш, күп итеп маллар асрыйлар, бакчада җиләк-җимешен үстереп, бәйрәм-чараларны да калдырмый, үзара ярдәмләшеп,  матур гына яшәп яталар. Авылның күркәм гаиләсе Алевтина һәм Евгений Муллиннар белән таныштырып үтәсем килә. Алар кече ферма тота. 8 савым сыеры һәм бозаулар, сарыклар асрыйлар. Гаиләнең хуҗабикәсе, чыгышы белән Мәлки авылыннан булган Алевтина Муллина белән сөйләштек:

“Үзем Хуҗа Хәсән авылы җирлегендә секретарь булып эшлим. Сыерларны машина белән савабыз. Азыгын сатып алабыз, ә җәен йөртергә болынлыклар бар. Хәзерге вакытта районнан килеп җыеп йөрүчеләргә сөтен тапшырабыз, литры 23 сумнан. Тырышкан кешегә авылда яшәргә була. Өч улыбыз, олысы Казанда укый, икесе мәктәптә укып йөриләр. Кечкенәсе “Инешкәй” ансамбленә дә йөри. Балалар уку алдынгылары”, – диде ул.

Муллиннар гаиләсе районда да, авылда да күп кенә чараларда катнашалар, җыр-моңга да осталар алар.