Галина Казанцева: "Әниебез төп йортны сатмаска, бетермәскә дип әйтеп калдырды"

Я. Емельянов исемендәге мәдәни үзәк 20 апрель көнне Татарстан Республикасының халык артисты, М.Җәлил исемендәге Татар дәүләт опера һәм балет академия театры солисты Галина Казанцева белән туры эфир үткәрде. Туры эфирны мәдәни үзәк хезмәткәре Сөмбелә Вәлиәхмәтова алып барды.

Галина Казанцева 1953 елның 12 ноябрендә Тукай районы Маҗын авылында дөньяга килә. Әтисе Александр Казанцев авылның иң яхшы комбайнеры була. Ул кечкенә Галинаны бер эштән дә курыкмаска, нык булырга өйрәтә. Әнисе исә керәшен җыруларына мәхәббәт уята. Галина Казанцева интервьюда төп нигезләрен бүгенге көндә дә саклап яшәүләре турында сөйләде. "Әниебез төп йортны сатмаска, бетермәскә, яшьләргә шуны әйтеп калдырырга дип әйтеп калдырды. Төп нигез буыннан-буынга шулай тапшырып калдырылырга тиеш. Әби-бабайлар торган нигезнең көче бөтен нәселгә җитә. Төп йортны саклау нәсел көчен, энергиясен саклау өчен кирәк", - дип сөйләде Галина Казанцева.