Бигешлеләр җәйнең ямьле бер көнендә ачык һавада самавырдан чәй эчте

Матур, истә калырлык чаралар, фольклор күренешләр, сәхнә әсәрләре тудырып, халык һәм тамашачы хөкеменә тәкъдим итәләр. Матур җәйләрнең кадерен белеп тагын бер истә калырлык чара – “Эх, самавырлы, коймаклы чәйләре” йоласы узды.

“Милли табыныбызның күрке – самавырны халкыбыз рухи кыйммәткә тиңли. Элек-электән самавырлы йорт ямьлерәк тә, утлы күмер кызуында гөжләп утырган самовардан ясалган чәй тәмлерәк тә саналган. Кичәгә килүче апаларны, кечкенә балаларны самавыр тарихы белән таныштырдык. Шулай ук аны кабызу, агарту йоласын олыларга да, яшь буынга да сөйләп күрсәттек”, – ди мәдәният йорты директоры Миңнегөл Насыйбуллина.

Самавырларда чыжлап, хуш исле үләннәр белән чәй кайнады. Ә аннары тәмле коймак белән үлән чәйләре эчтеләр. Чәй янында каен җиләге, җир җиләге, карлыган вареньелары һәм яңа аертылган иң тәмле, шифалы Карман балы да бар иде.

“Онытылмасын иде борынгы йолаларыбыз, кыйммәтләребез. Саф һавада бәйрәм уздыру йөрәкләргә ял, күңелгә дәрт өстәде”, - ди кичәдә катнашучылар.

Чыганак