Бердәм дәүләт имтиханы кирәкме-юкмы?

Халык бу төр имтиханнарны бик үк хупламый, югары уку йортларына, элеккечә, керү имтиханы тапшыру ягындарак.

Халык фикерен өйрәнү фонды мәгълүматыннан күренгәнчә, бердәм дәүләт имтиханын (ЕГЭ) хуплап бетермәүчеләр тикшерү-фикер белдерүдә катнашучыларның 61 процентын тәшкил итә. Ә бердәм дәүләт имтиханын яклаучылар — 23 процент. Җавап бирергә кыенсынучылар — 15 процент.

Бердәм дәүләт имтиханы кертелгәннән соң югары уку йортына керүе җиңеләйде дип уйлаучылар — 25 процент. Ә 44 проценты исә бу абитуриент тормышына начар тәэсир итте дигән фикердә тора. 

Сораштыру-тикшеренүдә катнашкан кешеләрнең 72 проценты вузга керү имтиханнары тапшыруның традицион системасы абитуриентларның белем дәрәҗәсен объектив бәяләү мөмкинлеге бирә дип ышана. 

Мәктәпләрдәге чыгарылыш классы укучыларының 26 проценты ЕГЭга мөстәкыйль рәвештә үзе әзерләнгән. 20 процентына дәресләрдә алган белеме ярдәм иткән. 14 проценты репетитор ярдәменә таянган. 13 процентына мәктәпләрдә өстәмә шөгыльләнүнең файдасы тигән.