8 март турында кызыклы фактлар

Март әле «шарт» булса да, барыбер күңелле ай инде ул. Кояш та шаян нурлары белән иркәли башлый, көннәр дә озыная. Яз — матурлык, яшәреш чоры, хисләренең ташкын булып аккан мәле. Юкка гына ул Җир йөзенең чәчкәләре — чибәр хатын-кызлар бәйрәме белән дә башланмыйдыр!.. Гүзәл затлар да нәкъ язлар кебек: назлары, мәрхәмәтлекләре белән салкыннан туңган йөрәкләрне эретәләр, әйләнә-тирәдәге ярату агачларын гөлгә күмәләр. Шул ук вакытта, алар, язлардай ярсу күңелләре белән кешелек дөньясына дәрт бирәләр.

Хөрмәтле хатын-кызларыбыз, нәнәйләр, түтейләр, печкәчәмнәр! Бар Җиһанны яшәтүдә Сезгә чиксез илһам һәм ышанычлы яклаучы-кадерләүчеләр телибез!

8 Март бәйрәме белән бәйле түбәндәге фактлар турында белә идегезме?

• Борынгы Римда ук хатын-кызлар бәйрәме булган. Әмма ул башка көнгә туры килгән. Ул көнне ирләр үз хатыннарына бүләкләр биргәннәр, хәтта кол хатыннар да бу көнне эшләмгән, ә ял иткәннәр.
• СССРда 8 март озак еллар дәвамында әле эш көне булган. Бары тик Бөек Ватан сугышында җиңүнең 20 еллыгы алдыннан, ягъни 1965 елның 8 маенда Халыкара хатын-кызлар көне булган 8 Март СССРда бәйрәм һәм ял көне дип игълан ителгән.
• 1910 елның 8 мартында француз очучысы, аэроплан белән идарә итү өчен лицензиясе булган Элиз де Ларош дөньядагы беренче хатын-кыз-пилот исеменә лаек була. 
• Хәзерге вакытта дөньяның 31 илендә 8 Март рәсми бәйрәм буларак уздырыла.
• Ә Япониядә ул Халыкара хатын-кызлар көне буларак билгеләп үтелми, аның каравы, 3 мартта — Кызлар көнен, 14 мартта — Ак көнне бәйрәм итәләр. 
• Европа илләренең күпчелегендәге шикелле, Франция һәм Германиядә 8 Март популярлыкка ия түгел, ул — гадәти эш көне. 
• Италиядә дә ул рәсми бәйрәм түгел, ә шулай да хатын-кызлар җыелып, күңел ачалар.

Керәшен дөньясындагы яңалыкларны «Туганайлар» сайтыннан һәм «ВКонтакте», «Одноклассники» социаль челтәрләрендәге группалардан укып, белеп барыгыз. Яңалыкларыгызны 89172509795 номерына «Ватсап» аша языгыз.