Иске Гришкин мемориалына Мәңгелек утның ялкын телләре Волгоградтан кайтартыла

Иске Гришкин авыл җирлегендә зур вакыйга көтелә. Бөек Ватан сугышында һәлак булган авылдашлары истәлегенә төзелгән мемориалдагы Мәңгелек ут моңа кадәр Җиңү бәйрәмендә генә кабызылган. Ә хәзер ул, чыннан да, мәңгелек булачак – һәрвакыт янып, авыл халкына Бөек Җиңүнең  нинди корбаннар бәрабәренә яуланганын, тыныч тормыш кадерен искәртеп торачак.

Мәңгелек утны, тантаналы рәвештә, 8 майда кабызачаклар. Бу көнне авылда Җиңү бәйрәме уңаеннан митинг уздырыла. Авыл халкын бәйрәм концерты, солдат боткасы көтә.

Иске Гришкин мемориалы өчен Мәңгелек утны Җиңү волонтерлары Волгоград өлкәсеннән үк алып киләләр.

“Бу – безнең өчен мөһим вакыйга. Мемориалдагы Мәңгелек ут моңа кадә, махсус көйләнгән газ баллоныннан кабызылса, хәзер ул һәрвакыт янып торачак”, – дип сөйләде Менделеевск муниципаль районының Иске Гришкин авыл җирлеге башлыгы Валентина Мамакова.

Алинә Галимҗанова.