Вадим Захаров Яңа елны шлагбаум янында каршылаган

Бу хәл студент вакытта булды, әле өйләнмәгән идем. Яшьләр бергә җыелышып, Яңа ел каршыларга булдык. Яхшылап әзерләндек. Шулай да, унике туларга ярты сәгать вакыт калгач, бәйрәм өстәленә нидер җитмәгәне ачыкланды.

Пчеловодта инде кибет бикле иде. Күрәсең, бик кирәкле нәрсә булгандыр инде, машинага утырып, алты-җиде чакрым ераклыктагы Шәмәрдән поселогына киттек. Эзләдек-эзләдек, анда да ачык кибет таба алмадык. Унике туларга ун минут калганда, кире кайтырга чыктык. Юлыбыз тимер юл аша уза. Шунда килеп җиткәндә генә шлагбаум безнең юлны бикләп куймасынмы!. Ялынсак та, будкада утыручы кеше безне чыгармады, чөнки поезд якынлашып килә иде. Яңа елны, дустым белән икәүләшеп, шунда машинада каршыладык. Поезд машинисты кычкыртып узды, без дә аңа сәлам биреп калдык. Бер дә истән чыкмый шул Яңа елны каршылау. Шулай кирәк булгандыр инде ул. Ашыкмагыз, дип, Алла бабай безне, бәлки, нидәндер саклап калгандыр...

Керәшен дөньясындагы яңалыкларны “Туганайлар” сайтыннан һәм “ВКонтакте”, “Инстаграм”, “Одноклассники” һәм “Фейсбук” социаль челтәрләрендәге группалардан укып, белеп барыгыз.