Хуҗабикәләргә файдалы киңәшләр.
- Салатка үсемлек маен тоз, уксус һәм борычтан соң гына салыгыз. Исегездә тотыгыз: тоз майда эреми.
- Бөтен яшелчә, җиләк-җимешне дә суыткычта сакларга ярамый. Бүлмә температурасында саклана торганнары: авокадо, абрикос, банан, цитруслылар, сарымсак, киви, кавын, нектарин, суган, груша, персик, слива, ананас, бәрәңге. Суыткычка куелырга тиешлеләре: алма, җиләк, кәбестә, кишер, сельдерей, чия, кыяр, кукуруз, ташкабак, виноград, гөмбә, яшел тәмләткечләр.
- Суган белән бәрәңгене янәшә сакларга ярамый, югыйсә суган тиз бозыла.
- Сыр киселгән урыныннан кипмәсен өчен, аның ул ягына атланмай сылагыз.
- Бананның «аякларын» азык-төлек өчен кулланыла торган пленка белән төрсәгез, ул өч-дүрт көнгә озаграк сакланыр.
- Помидорны целлофан пакетта сакламагыз, чөнки этилен помидорны тиз черетә.
- Имбирны суыткычның катыру бүлегендә саклау яхшы.
- Гөмбәне целлофанда түгел, кәгазь пакетта саклагыз.
- Сөт тизрәк кайнасын өчен, аңа бер чеметем шикәр салыгыз.
- Пычакны кайнар суда юарга ярамый, юкса, үтмәсләнә.
Фото: «Туганайлар»
Нет комментариев