Римма Самигуллинадан «Тәбә» рецепты

Керәшеннәр тәбәне традицион рәвештә Пасха, Питрау бәйрәмнәре алдыннан һәм гадәти көннәрдә пешерәләр. Тәбәне мин үзем дә бик яратып пешерәм. 

Кирәк булачак: 0,5 литр сөт,  7-8 күкәй, ярты чокыр су, чүпрә, шикәр комы, 1 калак манный.

Сөтне җылытабыз, аңа күкәй салабыз. Икенче савытка су, чүпрә, шикәр комы, манный салабыз һәм яхшылап болгатабыз. Чүпрә кабаргач икесен бергә кушабыз да, әзрәк кенә торгач тоз, он салып болгатабыз. Камыр коймактан бераз куерак булырга тиеш. Массаны агач калак белән болгатырга кирәк. Әгәр дә кисәкләр калмаса, камыр әзер.

Камырны табага салабыз. 40-45 минут 180 градуста духовкада пешерәбез.

Тәбә пешкән арада сыер мае эретәбез. Тәбә әзер булгач, аны шунда ук ромбикларга кисеп, эреткән майны өстенә салабыз. Бөтен сер майда, шуңа күрә ул күп булырга тиеш.