Марат Бариев: Конституциягә төзәтмәләр буенча эшне төгәлләргә кирәк

 Дәүләт Думасына Татарстаннан сайланган депутат Марат Бариев фикеренчә, Россиядә Конституциягә төзәтмәләрне кабул итүгә бәйле эшне төгәлләргә кирәк. «Төзәтмәләрне кабул итүгә әзерләнергә кирәк. Эпидемиягә бәйле куркыныч кимү белән, хокукый кырда үз урынын алсыннар өчен, төзәтмәләр буенча эшне төгәлләү зарур», - диде ул. Парламентарий Төп законга кертелә торган нигезләмәләрне хуплый. Коронавирус пандемиясе фонында аларга төзәтмәләр кертүгә килгәндә, ул вазгыятьне җентекләп тикшерергә кирәклеген дә әйтте. «Хокук белгечләре, җәмгыять боларның барысына да анализларга тиеш. Əлегә коронавируска бәйле вазгыять уңай якка үзгәрмәде, ул чәчәк ату чорын кичерә. Шуңа ашыкмаска кирәк», - диде депутат.