“Туганайлар” кызларыннан җиңел әзерләнә торт рецепты

Камыры өчен: 6 йомырка сарысы, 100 грамм шикәр, 1 стакан сөт, 80 грамм сыер мае, 1 аш кашыгы каймак, 150 грамм он, 1 чәй кашыгы күперткеч (разрыхлитель), 1 чәй кашыгы какао.

Өсте: 6 йомырка агы, 200 грамм шикәр комы.
Йомырка сарысын шикәр комы белән күпертергә. Сыер мае, сөт, каймак салып тагын болгатырга. Онга күперткеч кушып, әз-әзләп салып болгатырга. Пергамент кәгазе җәелгән табага салып, алдан җылытылган 180 градуслы духовкада 35 минут пешерергә.

Бисквит пешкән арада, йомырка агына шикәр салып, миксер белән 15 минут чамасы күпертергә. Бисквит пешкәннән соң духовкадан алып, өстенә күперткән йомырка агын салырга һәм тагын 10-15 минут 180 градуслы духовкада пешереп алырга. Суынгач өстенә какао сибеп җибәрергә.

Чәегез тәмле булсын!