Яшь бәрәңгене кайчан ашау үзегезгә бәйле

Бәрәңге иртә өлгерсен өчен, март азагында – апрель башында 20 бәрәңгене (утыртырга яраклы орлыклык бәрәңгене!) баздан алып, өйдә, көн яткысында 25 тәүлек тоталар. Элегрәк картлар аны 3 литрлы банкага салып та, кояш төшәрдәй урынга куя торган булганнар.

Шуннан соң, үрә башлаган бәрәңгеләрне саклык белән генә алып, сөттән я кефирдан бушаган пакетлардагы туфракка (15-20 сантиметр калынлыктагы ) утырталар. Бәрәңге туфрак белән тулысынча күмелергә тиеш. Бәрәңгеле ул пакетларны кояш төшә торган тәрәзә төпләренә куялар. Вакытында су сибеп торалар.

Май азагында, кырау төшү куркынычы беткәч тә, аларны бакчага алып чыгып утырталар: пакетларын сак кына кисеп, бәрәңге үрентеләренә дә, тамырларына да зыян китермичә, ипләп кенә күчерәләр. Бу вакытка бәрәңге сабагы 12-15 сантимер чамасы үскән була...

Бакча тутырып утырткан бәрәңгегез үсеп, өлгереп җиткәнче, тансыкка, яшь бәрәңгедән авыз итеп карый алырсыз.