Георгий сольный концерт әзерли

- Үземнең аерым концертымны куймасам да, мин, Аллага шөкер, моңарчы гел сәхнәдә булдым. Концертларда катнашып киләм. Мине яраткан, көтеп торган тамашачым бар. Әнә шул чыгышлар вакытында бер-беребез белән күрешәбез, җырларым өчен рәхмәт әйтәләр. Миңа менә шулар җитә, дип исәпләдем. 15ендә буласы концертыма килгәндә исә, бу - үземнең генә инициативам түгел. Филармониядә эшләүче иптәшләрем дә, коллективның художество җитәкчесе Лидия Әхмәтова да: "Әйдә, Георгий, аерым концертыңны эшлик әле", дип кыстагач, үземнең дә моңа әзер икәнлегемне аңладым. Еллар өстәлә, олыгая барам. Тамашачыга ишеттерәсе җырларым, җиткерәсе сүзләрем бар. Сер итеп кенә әйтәм: мин бит әле шигырьләр дә язгалыйм. Күңел түреннән шигырь булып чыккан әнә шул хисләремне дә яңгыратасым килә. Бер сүз белән әйткәндә, мондый концертка өлгереп җиттем бугай.

- Алдан ук әйтеп куям: шоу-концерт оештырмыйм. Бу - гадәттәге лирик концерт булачак. Программабыз ике бүлектән тора. Беренче бүлектә татар композиторларының лирик җырлары яңгыраячак. Репертуарымда рус, итальян композиторларының әсәрләре дә бар. Икенче бүлектә ретро җырлар - үзем яшь чакта яратып җырлый торган көйләр булачак. Концертымны нәфис сүз остасы Рәшит Сабиров алып бара. Ул минем шигырьләремне дә укыячак. Иң уңышлы дип санаганнарымның берничәсен үзем дә укырмын дип торам. Концертым мине яраткан тамашачы белән чын күңелдән аралашу, аңлашу рәвешендә узар дип өметләнәм, һәрхәлдә, шуны телим.

- Татарстанның халык артистлары, карендәшләрем Галина Казанцева белән Лидия Әхмәтовалар, яшь башкаручылар Гөлнара Байназарова белән Айрат Имашевлар җырлаячак. "Сәйдәш" бию ансамбле башкаруында 2-3 бию күрсәтеләчәк. Әлегә - шулар. Бәлки, алга таба, әзрәк үзгәрешләр дә булыр.

- Бик дулкынланам. Төннәремне йоклый алмый үткәрәм. Тамашачыдан куркам, дип әйтә алмыйм анысы. Мамадыш төбәгеннән күп кенә якташларым киләсе. Алар алдында чыгыш ясау икеләтә-өчләтә җаваплылык өсти. Өмет-ышанычларын аклармынмы, аларга минем өчен кызарырга туры килмәсме, дигән уйлар борчый. Болар, билгеле, хәсрәтле борчылу түгел, ә күңелле борчылулар гына. Бары да әйбәт булыр дип өметләнәм.