Ковидтан ничек сакланырга?

22-28 августта илебезнең төрле төбәкләрендә яшәүчеләр арасында Ковидка кагылышлы мәсьәләләр буенча сораштыру-тикшеренү уздырылган. Аны Гарант.Ру (гарантияләнгән хокукый ярдәм порталы) үткәргән.

 Нәтиҗәләр түбәндәгечә: халыкның 48 проценты чир йоктыру куркынычы зур булмаганлыктан, яңа чаралар күрүне мөһим дип санамый.

20 проценты иң яхшы саклану чарасы дип, эш бирүчеләргә үз хезмәткәрләренең бер өлешен читтән торып эшләргә күчерү бурычын йөкләргә, дигән фикер белдерә.

16 проценты җәмәгать урыннарында медицина маскасы киеп йөрүне кабат кертү ягында.

7 проценты илдә локдаун (катгый изоляция) кертүне дөрес чара дип ышана.

 7 проценты эш бирүчеләргә үз хезмәткәрләрен вакцина ясатырга җибәрү бурычын йөкләргә тәкъдим итә.

2 проценты җавапның үз вариантын әйткән: “чит илләргә йөрмәскә кирәк, чир дә көчәймәс”, “халык поликлиникаларда күпләп җыелмасын өчен, вакытында медицина ярдәме күрсәтү мәсьәләсен хәл итәргә кирәк”.