Югары Баграж балалары кошларга ярдәм итә

Иртә язда кошларга азык табарга кыен. Урамнар һаман да кар көртләре, ә сулыклар калын боз катламы белән капланган. Шуңа күрә кошлар кешеләр янына елыша, агач ботагына кунып чыркылдашып, адәм балаларының игелекле гамәлләренә, мәрхәмәтенә өметләнәләр. Чөнки кошларга салкыннар түгел, ә ачлык күбрәк куркыныч тудыра.

Шуңы күздә тотып, Югары Баграж авылы мәдәният хезмәткәрләре балалар белән бергә кошларга ярдәм итү буенча акция үткәрделәр. Алар җимлекләр ясап, мәдәният йорты тирәсендә  үсеп утырган агачларга элделәр.

“Балалар белән кошларга җимнәр сибеп, кошчыкларның чөкердәшә-чөкердәшә җим чүпләгәннәрен сокланып күзәттек. Кошларга ярдәм итә алуыбыз өчен без бик сөендек”, -ди мәдәният йорты җитәкчесе Гөлшат Хрипунова.
Табигатьне, әйләнә-тирә мохитне саклау, балаларга шуны өйрәтү - саваплы бурыч бит. Һәрберебез кошларга аз гына булса да өлеш чыгарса, алар җәйне исән-имин каршылар иде.

"Зәй офыклары"