Якты Күлдә Казанская гөрләде

Бәйрәм оешкан төстә узып,  барлык авыл халкын, аннан читтә яшәүчеләрне һәм  күпсанлы кунакларны бер мәйданга җыйды. Ул көнне һәр тарафта бәйрәм рухы, күңел күтәренкелеге иде. Кунакларны җирлек башлыгы Зиннур Мөхтәров сәламләде. Бәйрәмне ачу тантанасында район башлыгы урынбасары Валерий Акатьев катнашып, халыкка Казанская белән котлау сүзләре ирештерде. Һәр елдагыча, бәйрәмдә төрле бәйгеләр, спорт ярышларына, уен-көлкегә  киң урын бирелде. Аларда балалар һәм өлкәннәр теләп катнашты. Кечкенәләр өчен балалар мәйданчыгы эшләде. Күркәм традиция буенча бәйрәмдә юбилейлары булучылар, Казанскаяда танышып, кавышкан гаиләләр билгеләп үтелде. 

Тамашачы алдында “Сәвәләй”, “Керәшен моңы”, “Җиләк”  керәшен, “Русская душа”  рус фольклор ансамбльләре, җырчылар чыгыш ясады. Бәйрәм дәвамында  яшь тамашачылар өчен интерактив уеннар һәм төрле конкурслар оештырылды. Көянтә чиләк белән су ташу, капчык киеп йөгерү, кузлада  утын кисү һ.б уеннар кунаклар күңеленә хуш килде.  Бәйрәмне  Мария Шугулева белән Рөстәм Шиһабетдинов  алып барды.

- Әлмәт шәһәреннән килгән бертуган аккордеончы Дыренковлар дуэты, шәһәр һәм районның артистлары һәм фольклор коллективлары чыгышы бәйрәмгә тагын да ямь өстәде. Казанскаяның елдан-ел киң колачлы итеп оештыру халыкка ошый, -ди Якты Күл мәдәният йорты директоры Татьяна Егорова.
Якты Күлдә әлеге бәйрәм көнне чыгарылыш сыйныф укучыларының очрашуы матур гадәткә әйләнде. Агымдагы ел бәйрәмендә 1979 һәм 1986 елларда Якты Күл мәктәбен тәмамлаучылар очрашты. Бер күрешү бер гомер бит.

Рәзимә Кашапова, "Зәй офыклары"