Ул уйнаган көйләргә, ут уйнатып биибез

Авылларда гармун моңы сирәк ишетелә торган заманда яшибез, гармун сузучылар бик аз. Ә андыйлар кирәк бит. Февраль аенда Бакалы районының мәдәният йортында “Моңнар кайтсын авылга, гармун телләре белән” дигән бәйге игълан ителгән иде. Анда төрле яшьтәге 85 гармунчы катнашып, үз осталыкларын күрсәткән. 11 мартта шушы бәйгедә җиңүчеләрнең Гала-концерты уздырылган. Бәйге нәтиҗәләре хакында Корчай авылы мәдәният йорты җитәкчесе Надежда Пятибратова безгә түбәндәгеләрне хәбәр итте: “Җиңүчеләр арасында туган авылында 45 ел тракторчы булган мактаулы механизатор, 87 яшьлек карендәшебез Михаил Грушин да бар. Бу бәйгедә ул “Иң олы яшьтәге гармунчы” номинациясендә диплом белән бүләкләнде. Аның чын күңелдән сөенүен сүзләр белән әйтеп кенә аңлатырлык түгел. Оештыручыларга һәм, шундый конкурска чакыруыбыз, алып баруыбыз өчен безгә дә чиксез рәхмәтләрен белдерде Михаил дәдәебез. Авылда аның матур итеп гармунда уйнавын белмәгән кеше юктыр. Кичләрен урамга чыгып, гармунын тартып җибәрсә, янына авылдашларны бик тиз җыя да куя ул! Уйнавына кушылып, әбиләр керәшен җыру-такмакларын әйтеп, яшьлек елларын искә төшерәләр, ә яшьләр ут уйнатып бииләр. Олы яшьтә булуына карамастан, үзе янында яшәүче кызына йорт-җир эшләрендә дә булыша, концерт-бәйгеләрдә дә теләп катнаша”.