"Туым Жондозы" конкурсында нинди үзгәрешләр кертелгән?

17 декабрь көнне Яков Емельянов исемендәге мәдәни үзәктә Республика керәшен иҗтимагый оешмасының идарә членнарының утырышы булды. Шунда "Бәрмәнчек" ансамбленең художество җитәкчесе Эльмира Кашапова XI “Туым жондозы” – “Рождественская звезда” россиякүләм керәшен җыруын яшь башкаручылар конкурс-фестиваленең яңалыклары, сайлап алу турларының барышы турында сөйләде.

Быелгы фестивальдә “Керәшен җыры авторы”, “Халык хореографиясе”, “Фольклор-этнографик коллектив” номинацияләре һәм 26-35 яшькә кадәр зурлар группасы барлыкка килгән. Икенче елга керәшеннәрнең кул эшләренә, костюмнарына багышланган “Гамәли сәнгать” номинациясе булдырырга уйлыйлар. 2 февраль көнне беренче дәрәҗә диплом алган коллективлар Казан шәһәренә чакырылачак. Конкурсның финалистлары өчен сөенечле хәбәр бар. Хәзер солистлар һәм коллективлар өчен  аерым Гран-при булачак.