Поршурның балалар бакчасында сабыйларга милли тәрбия бирелә

Кукмара районының Поршур авылындагы балалар бакчасында эшләүче тәрбиячеләр: “Балаларга кечкенәдән керәшеннәрнең бәйрәмнәре, уен, җыр-биюләре аша милли тәрбия бирергә тырышабыз ”, – диләр.

– 24 апрельдә халкыбызның иң зур бәйрәмнәренең берсе – Пасха бәйрәме булды. Шул уңайдан, бездә балаларда керәшен бәйрәмнәренә карата кызыксыну уяту, әби-бабайлардан калган моңнарны, йола-гадәтләрне яңарту максаты белән “Пасха” бәйрәме уздырдык. Анда балалар “Күкәй җыю”, “Тау башындагы уеннар” сәхнәләштерде. Балалар халкыбызның җырларын, биюләрен, уеннарын башкардылар. Килгән кунакларыбыз да читтә калмадылар, безнең белән уеннар уйнап, җырлап, күңел ачтылар, – дип хәбәр итте тәрбияче булып эшләүче Зоя Николаева һәм Ильмера Сергеева.