Пчеловодтан Барановлар тавыгы Пасха көнне «ХВ» дигән язулы күкәй салган

Кукмара районының Пчеловод авылында яшәүче Барановларның Олы көн иртәсе гадәттәгедән аермалы булган. Бу көнне аларның тавыгы "ХВ" дип язылган күкәй салган. 

– Без бу хәлне Ходайның чын кодрәте, дип кабул иттек. Туганнар белән дә шаккатып карадык. Күкәйнең ике ягында да "ХВ" дигән хәерефләр таптык. "Христос Воскрес", дигән сүзләр инде ул. Интернетта гарәп символлары белән язулы күкәйләр, хайваннар тууына ышанмыйча карый идем. Үзебездә шундый хәл булды. Бу хәл Ходайның бәхиллеге булсын инде, – дип сөйләде гаилә башлыгы Василий Баранов. 
 

Барановлар әлеге күкәйне пешереп, кызылга манып, тәре алдында сакларга планлаштыра.