Керәшеннәр "Таба" яшьләр этнофорумында катнашты

Форумда милли мәдәният һәм фольклор өлкәсендәге проектлар тәкъдим ителде. Исегезгә төшерәбез, форумда  "Бәрәкәт" хәрәкәте активисты Аида Сахарова, "Бәрәкәт" хәрәкәтенең экс-җитәкчесе Светлана Максимова, "Бәрмәнчек" ансамбле биючесе Юлия Габдрахманова, Керәшен Сәрдәсенең "Сәяр" ансамбле катнашучылары Айдар Маннапов һәм Маргарита Петрова да катнашкан иде. Алар форумның сертификатлары белән бүләкләнде.

Иң уңышлы проектларга грантлар бирелде. Шулай итеп, 50 меңлек сертификатлар белән Ethno sound проекты белән Герман Винокуров һәм Павел Александров, "Традицион халык уеннары" Youtube каналы белән Евгений Шутько һәм "Урам театры „Этно“ спектакле" белән Гөлназ Ханнанова бүләкләнде.

"Таба" этнофорумының бүләкләү тантанасыннан соң Халыклар дуслыгы фестиваленең концерты оештырылды. Концертта 2019 елда "Таба" акселераторында "Этномьюзик" проекты белән җиңгән "ZAKARIA" ансамбле дә катнашты. Белгәнегезчә, әлеге ансамбльдә "Кряшен чибяре" Татьяна Ефремова да солист.

Ансамбль грант акчасына Идел буе халыклары җырларыннан торган альбом яздырган. "Эш ахырына якынлаша. Альбомның 80% әзер", - дип сөйләде "ZAKARIA" ансамбле солисты Әдилә Мөбәрәкова.

Форум кысаларында оештырылган күргәзмәдә "Бәрәкәт" хәрәкәте җитәкчесе Алексей Дмитриев катнашты. Ул форум кунакларын һөнәрче, Алабугалы Лидия Ломакина ясаган керәшен курчаклары белән таныштырды.