Керәшен блогерларына "Татмедиа" акционерлык җәмгыятенең "Тамга" премиясе тапшырылды

Керәшен блогерлары Олеся Дмитриева белән Василий Иванов "Татмедиа" акционерлык җәмгыятенең "Тамга" премиясен алдылар. Әлеге премия интернетта татар телендә алып барыла торган иң яхшы проектлар өчен бирелде. "Тамга" сыннарын тапшыру тантанасы кичә, 3 мартта, Милли китапханәнең "Моң" театраль мәйданында булды. Җиңүчеләрне өч номинациядә бүләкләделәр: "Инстаграмда милли аккаунт", "Татарлар ТикТокта", "Татарча Ютуб канал".

Кукмара районыннан авыл тормышын, эшен күрсәтүче Василий Иванов "Инстаграмда милли аккаунт" номинациясенең җиңүчесе булды. Сынны алырга чыккач ул әлеге премиягә чакырулары өчен рәхмәт әйтте. "Видеоларны кызган чакта куеп атабыз. Кызган чакта куймаска кирәк икән", — диде ул. Безнең коллегабыз, ТикТокта, Инстаграмда актив рәвештә аккаунтлар алып баручы блогер Олеся Дмитриеваны "Татарлар ТикТокта" номинациясендә бүләкләделәр. Ул да оештыручыларга рәхмәтен белдерде. "Татар телендә милли аккаунтлар үссен", — дип теләде ул. Карендәшләребезне котлыйбыз!

Фото: Салават Камалетдинов