Федора Краснова: "Җирән кәҗәм дә Питрау җиләге белән сыйланган"

Һәр елны 12 июль көнне, иртән җиләк, файдалы үләннәр җыеп калу өчен болынга чыга торган гадәтем бар. Бу юлы да җирән төстәге кәҗәмне иярттем дә, тауга менеп киттем. Кәҗәм бер дә минем арттан калмый. Кая гына барсам да – болынга чыгаммы, басугамы, гел миңа тагыла. Тау итәгеннән җиләкне күп җыйганнар, шуңа, якында гына үсеп утырган наратлыкка кереп киттем. Юл кырые булганга андагы җиләкнең күплеге! Мин тиз арада чиләгемне тутырдым да, чиләгемне элеп калдырып, дару үләннәре җыю, гөмбәләр  карау нияте белән, наратлык эченә кереп киттем. Бераз вакыттан соң, чыксам, ни күрәм, кәҗәм дә артымнан калмаган икән. Әмма, нигәдер, бик әкрен килә, җитмәсә, бите-башы һәм колакларына чаклы кып-кызыл. Ни булган кәҗәмә, димен. Берәр җирдә кысылып яралангандыр, дип уйлыйм. Әйбәтләбрәк карасам, җиләк тулы чиләгемне тартып төшергән дә кәҗәкәем, рәхәтләнеп, Питрау җиләге белән сыйланган. Менә шулай Питрауда җиләк җыеп кайттым мин, - диде ул.