Эльмира Кашапова: "Төрле милләтләрнең жанрларын, традицияләрен берләштердек" - видео

"Бәрмәнчек" дәүләт фольклор ансамбленең "Туганаем" җырына яңа клибы дөнья күрде. Клипны режиссёр Рөстәм Рәшитов төшергән. Борынгы керәшен җырыуын заманча аранжировка белән эшләгәннәр. Җырда Иван Чуркин уйнавында шотланд волынкасы моңнарын да ишетергә була.

"Җыр тавыш ягыннан аутентик язылса да, аның аранжировкасы заманча эшләнелде. Җырда мин волынка моңнары яхшы ишетеләчәк дип уйладым. Без фольклор волынка тапмадык. Ләкин шотланд волынкасында оста уйнаучы Иван Чуркин турында белдек. Волынканың керәшеннәргә нинди кагылышы бар дип сораучылар булыр. Ләкин эш монда түгел. Клип сценариесы буенча шотланд егете музейга керә һәм керәшен костюмнары каршында туктала. Аның игътибарын керәшен хатын-кызлары киеменнән булган манекен җәлеп итә. Һәм шул минутта ук егетнең хыялында әлеге матур күлмәкләрне, нәфис бизәкле баш киемен кигән чибәр керәшен кызлары  гәүдәләнә.

Бу клип - шотланд егетенең керәшеннәрне, аларның җыруларын күзаллавы буларак төшерелгән. Музыканы, сәнгатьне без милләтләргә аермыйбыз. Шотланд волынкасы керәшеннәрнең колоритын яхшы чагылдыра. Бу клипта без төрле милләтләрнең жанрларын, традицияләрен берләштердек", - дип сөйләде "Бәрмәнчек" ансамбленең сәнгать җитәкчесе Эльмира Кашапова.