Чистайдан Алексей Ефимов: Иван Егоров – һәр керәшен өчен өлге

“Җитәкчебез Иван Егоровның 60 яшьлек юбилее – керәшен халкы тормышында мөһим вакыйга, чөнки аның яшәү рәвеше һәр керәшен өчен – үрнәк, өлге. Татарстанда гына түгел, Россия Федерациясендә яшәүче барлык керәшеннәрне туплау, яшь буынның милли үзаңын һәм мәдәниятебезне үстерү, милләттәшләрнең дуслыгын ныгыту өчен ул зур көч куя. Гадел шәхес булу һәм карендәшләргә ихтирам белән карау һәркемгә дә бирелми. Үз эшеңнең остасы булу, заман сулышын тоеп, тарихны да онытмыйча, бер үк вакытта берничә өлкәдә дөрес юл белән алга бару – чын талант! Иван Михайлович шундый талант иясе”, - дип сөйләде Татарстан Республикасының иҗтимагый оешмасының Чистай районы бүлеге җитәкчесе урынбасары Алексей Ефимов.

“Иван Михайловичның хезмәте һәрвакыт югары бәяләнсен, башкарган эше күңел канәгатьлеге китерсен. Киләчәктә дә кулга-кул тотынып, бердәмлекне саклап эшләвебезгә ышанып калабыз”, - дигән теләкләрен белдерде чистай керәшеннәре лидеры.