Бездә бәби бар!

4 май көнне Казан шәһәрендә Людмила Аланлы беренче тапкыр әни булган. Көтеп алынган кызларына Мария диеп исем кушканнар. Әлегә кызчык белән әнисе бала тудыру йортында. Аларга исәнлек-саулык, тәмле йокылар, үсәргә күп көч телик. Котлыйбыз! 

Шул уңайдан, Людмила Аланлының  шигырен тәкъдим итәбез

... Бу дөньяда бар нәрсә дә

Үз вакыты белән килә:

Җиргә төшә сары яфрак

Үз урынын белеп кенә;

Карлар ява - һәр бөртеге

Җирнең битен үбеп кенә;

Кышлардан соң язлар килә,

Өмет гөлен үреп кенә;

Сулар ага иркен итеп,

Булса гына үзенең яры;

Сусыл булып җиләк пешә

Үз тавында гына бары;

Үз талында гына кошлар

Рәхәтләнеп сайрый ала...

Ямьләп Җирне туа бала - 

Үз илендә бәхетен таба.

Шатлык, куанычлар килә

Үз вакыты җитеп кенә.

Әй син, Кеше!

Бәхетеңнең кадерен бел дә

Саклап гомер ит кенә!