Бөек Ватан сугышы ветераны Иван Егоров вафат

1941 елның августында Иван Егоровны Саратов өлкәсенең Вольск шәһәрендәге авиация мәктәбенә укырга җибәрәләр. Керәшен егете  Як-1 самолет-истребителен, аннан бомбардировщикларны өйрәнә. 1942 елны укуын тәмамлагач, Ленинград фронтындагы  авиация полкына авиамеханик итеп билгеләнә. Анда ул очкычларны хәрби очышларга хәзерли. “Булдыра алганча карап, майлап, төзәтеп тордык. Безнең бурыч – ничек тә фашист самолетларын Ленинград шәһәренә кертмәү. Минем самолетларда 1100 очыш ясалды. 52 самолетымны фашистлар бәреп төшерде. Хәтта бервакыт һавага күтәрелергә бер генә самолетыбыз да калмады”, – дип искә алган иде ул бер әңгәмәбездә.

Сугыштан соң өч ел хезмәт иткән Иван Егоров 1948 елда кайта. Югары педагогик белем ала һәм гомерен балалар укытуга багышлый. Ул башта – Сауш, аннан Субаш мәктәбендә директор булып эшли.

Иван Егоров 1943 елда – “Батырлык өчен” медале , 1985 елда – II дәрәҗә Ватан сугышы ордены; “Ленинград оборонасы өчен”, “Германияне җиңгән өчен” һәм башка юбилей медальләре белән бүләкләнә.

Хатыны Александра белән Олег, Валерий, Юрий, Владимир (ни кызганыч, 22 яшендә суга батып үлә) исемле дүрт ул үстерәләр.