Башлангыч класс укытучысы Валентина Фоминаның эш көне мәктәп ишегалдыннан башлана

Валентина Фомина бүгенге көндә 1нче класс балаларын укыта. Хезмәт юлын балалар бакчасында башлап җибәргән булса, хәзер инде мәктәп балаларына белем бирә.

Аның эш көне мәктәп ишек алдыннан балаларны каршы алу белән башлана. Барлык балалар класска җыелып беткәч, кыңгырау шалтырагач, дәрес башлана. Балалар хәзерләп килгән өй эшләрен күрсәтә. Укытучы тыңлый, тиешле билге куя.

Укытучының эше дәрес укыту белән генә чикләнми. Хезмәт дәресендә кул эшләре белән дә шөгыльләнәләр. "Оста куллар" исемле "түгәрәк"тә балалар "эх" дигәнче бәләкәй көймә ясап куйдылар.

Аннан җыр дәресе башланды. Валентина Владимировна көй куеп, балалар Әлифба бәйрәменә җырланачак җырларын өйрәнә башладылар. Кемдер кычкырып җырлый, кайберәүләре – каушабрак кала. Укытучы балаларга оялмаска, кыюрак булырга өнди.

Әкрен генә балалардан сорыйм: "Сезгә укырга ошыймы дип?" "Әйе, укырга бик ошый, безнең Валентина Владимировна – иң яхшы укытучы", –  диләр.

Укытучының бер көне бик кызыклы һәм мавыктыргыч икән. 

Сәвәләй мәдәния йорты җитәкчесе Ләйлә Сабаева