Багражлылар эшли дә, ял да итә беләләр - видео

Зәй районының Урта Баграж авылы кызлары бертуган Светлана һәм Валентина Бояровалар, Роза Шалапаева яшьлектәге кебек капка төбенә җыелып, "Баграж буйлары" җыруын, керәшен көйләренә тезмә җырларга яраталар.
Светлана читтә яшәсә дә авылга еш кайтырга тырыша:
"Бу юлы да бәйрәмнәр алдыннан үзебезчә бераз өмә ясап, йорт яннарындагы, юл кырыйларындагы чүп-чарны җыештырып, тагын вак-төяк эшләрне җайлап куйгач, күңелләр яктырып, матурланып китсен дип, кулга гармун алып, Валя белән капка төбенә чыктык. Без чыкканны күреп, Роза килде, җырулар суздык. Һәрбарчабызның гаиләсендә иминлек булсын, үзебез сау-сәламәт булыйк, җырлап яшик", – диде ул.
Бертуган Бояровалар сәнгатькә гашыйк кешеләр. Бу талант аларга әтиләреннән килгәндер диләр авыл халкы. Валентина яшьтән гармун уйный. Бүген дә аннан аерылмый – шатлыгын да, борчуларын да җыр-моң белән бүлешә.
Алабуга культпросвет техникумында укыган ул. Шигырьләр дэ яза, үз якларында узган концертларда актив катнаша.