Иртәгә Тихвин чиркәвендә соборование була

2 апрель көнне иртәге 9 сәгатьтә Казан шәһәренең Тихвин Алла Анасы иконасы чиркәвендә керәшенчә соборование, яки май сөртү җәшереге була. Соборование, күпчелек вакытта, Олы уразаның 4-5 нче атналарында уза.

Май сөртү җәшерегенә кешеләр савыгу, чирдән арыну өчен бара.  

Еванглие китабында “Чирләп, урыннан тормый ята башласагыз, священниклар чакыртыгыз. Алар – җиде священник килеп, укып, май сөйтергә тиеш”, дип язылган. Әлегрәк заманда ул теләсә-кайсы вакытта һәм өйдә генә эшләнгән. Хәзер инде дөньялар бераз үзгәргәч, кешеләр үзләре чиркәүгә барып, соборование уздырталар.

Бу йоланы башкарганда священник кешенең исемен әйтеп, җиде тапкыр укып, җиде тапкыр май сөртә. Шуннан соң, священник Еванглие китабын ачып, һәрбер кешенең башына куя. Соборование вакытында җазыклар кичерелми. “Соборованиега булган җазыкларыңны әйтеп, үкенеп, өлеш алып килергә кирәк”, - ди священниклар.

Фото Тихвин Алла Анасы иконасы чиркәвенең "Вконтакте" группасыннан алынды